أَلتو سَاكس Alto sax - الشاعر خالد عاطف ابو العزم

تألمتُ حين دستُ على قدمَكِ أثناءَ الرقصِ .. وضحكتى .. عندما داست الدنيا على قلبى !!!

أَلتو سَاكس
( Alto sax )

إتنين فى الكازينو ..
وترابيزه .
مع نور خافت
واتنين كوكتيل أحلام
فاضل على أول رقصه .. مسافة حضن
عايزاها ؟ ..
صحيح .
لكن ب تخاف .. لَ تدوس على رجليها الأيام
كان صوت ال ( سَاكس ) ال ( ألتو ) رخيم
والجو .. رِخِم
متعبأ بالدخان
وشياط من قلب مولّع
من كبريت الوعد
ورماد ل سجاير ناس .. ب تفارق بعض .
كانت ب تراقبُه وهوّا ب يملا المدفع ب الطلقات
وب يرمى عليها دانات الحب الشابّه
كان واخد تبّه
ومجهّز قلبُه يخش .. ف وقت الإستسلام
وساعتها افتكرت بياع الفُل
ب إيديه المليانه
وعنيه الحافيه
الفل ف إيده دَبَل
وبكل خَبَل .. ب يبيع بالعافيه
أنا كنت هناك
ف ميعاد مع نفس الكرسى الفاضى
ب نعيد الماضى
وباحاكم قلبى - ب نفسى - عليه
لا شهود
ولاقاضى
الحب امّا ب يمرَض ب السُل
ب يموت الفُل
لو حتى مفتَّح ف إيدين البياع
الذكرى ب تفضل .. كوبَّاية شاى بالنعناع
ناقص .. سكر
ب تعدّى الأيام .. يتعتَّق
تشرب ....... تسكر .
وقت امّا الحزن يكون واحد
أنا ب ابقى اتنين
اتنين فى الكازينو ..
أنا .. وكُرسى .
يجمعنا .. سكوت
ال ( ساكس ) ال ( ألتو ) .. رخيم الصوت
ب يكلّم قلبى و ب يقول لّه
فاضل على آخر رقصَه .. مسافة .. موت .

السَاكس : آلة موسيقية غربيَّه .. من أنواعها ال ( ألتو ) وهى آلة ذاتَ صوتٍ رَخيمٍ بديع .

خالد عاطف أبو العزم