محتاره بين الإتنين
مابين قلبي وبين عقليتعبت كتير
وأخدت وقت كتير ياما
من التفكير
أطاوع القلب والا العقل
دِلوني
ما نا بينهم كما العايش
ف سيرك كبير
دا نا عامله لهم قاضي
يوماتي خناقة ف الفاضي
تحقيق ومُصالحة ما بينهم
وياريت واحد فيهم راضي
والله زهقت م التبرير
أصالح القلب واقولوا إهدَى
يقول والله مش هاهدَى
غير لما يسيبني ف حالي
ويعرف إن الحب أَبْدَى
وان جموده دا أمر خطير
أروح للعقل يقولي خلاص
دا نا ميزانك جوا الراس
بَلا حِنيَّة بَلا هَم تِقيل
سيبك بقى بَلا إحساس
مازهقتيش
من كُتر التفسير؟
زهقتوني طب أعمل إيه
بينك إنت وهو يا بيه
حُكم العدل ما بينكوا يكون
ولا واحد فيكوا يقولي دا ليه
أنا هاحكم طبعاً بضمير
أول حاجه مابين الاتنين
بطلوا بقى تضربوا أسافين
كملوا بعض بحِكمة وطِيبة
عيشوا حياتكم بقى راضيين
وبلاش واحد م التاني يغير
أصل الغيرة دي نار بتدمر
حتى لو عيشتك حرير ومَرمَر
منهجنا هو الوسطيَّة
ومحدش ع التاني يتأمر
ونسِيب على الله التدابير
هنائيات
هناءالغمري
ليست هناك تعليقات:
إرسال تعليق