شكرا كتير - الشاعرة منى عبد الرحمن

شكرا كتير

شكرا يادنيا
شكرا كتير لكِ ياأنا
لاعبتِ دنيا ف ماتش كان من غير شرف
كِسْبِتْ فِيهْ هيا
خِسِرت انا
شكرا كتير لكِ ياأنا
كان الحَكم جلاد وقاسي في القانون
حكم عليَّا بالفراق
بالاشتياق
يِوْجَع ف عمري إلِّلي باقِ
يِهِدْ قلبي الِّلي بَنِيتُه بالحنين
وبْدَالُه يبني حِيطََه صَلْد
مايْخُشْهَاش لاشوق بيوجع ف الضلوع
ولاحتى بَرْد
شكرا يادنيا
حقيقي شكرا بالقَوي
دايما بيجرح شوك إيديكِ الطيبين
مافيش ف قلب عْنِيكِ مِلَّة
ولافِي روحِك أي دين
وانا يعني كُنت عَمَلْت إيه
جُوايا حِلم حِلِمْت بيه
كان قصدي يعني أَكَبَّرُه
وأعيش عليه
يمكن يِفَتَّح لي عُيون أحلام كتير
يمكن أطير
وامسِك سحاب
واركب بُساط الريح
عشان اشوف بس القمر
كان بس قصدي اني أشُوفُه
مش عاوزه يعني أحْضُنُه
ولاعاوزه ضَيُّه يِشُق عيني والجبين
عاوزاه وبس يِبُصِّلي
ويحس جوايا الحنين
ماطْمِعْتِش انا ف الكون بِحِالُه أمْلُكُه
ولايعني أجَّر شَقَّة فيه
كل الحكاية إني اطوف بس ف عِنيِه
قاسية قوي
قاسية يادنيا بالقوي
ولَاعِبْتي طِير مَكْسُور جِناح
كان نفسه بس يطير ف حِلْم
كان نفسه يحلم ف البراح
شكرا يادنيا
شكرا كتير لكِ ياأنا

منى عبد الرحمن