قول يا وطن
نامت عيون الناس
وعيونّه لسه مفتحة
تحلم ينام الليل
فى حُضن نجمة مروحة
تبعت أدان الفجر
فوق ضهر نسمة مصحصحة
تاخد ندى تغسل
وجوه صحيانة لسة بصمتها
تمسح دموع من سدرها
تفرش أمل
فى الصُبح بدري بحُبها
لجل الولد يجري على فرش الأمل
ويقوم وياخد يدّها
قوم يا وطن
مالك حزين إفرد شِراع الحُب
يلّه كحّل صُبحها
عارف يا قلبي ويَا وطن
أيه يداوي م الحَزَن
عارف كدة ولا اتكِتِم
دا نهارنا لسة بيبتسم
البت فاطمة اتجوزت
وفيه ديون متلتِلة
من الجهاز ويّا العزال
ماشيين بنحمد ربنا
وأيه كمان
صبرك يا قلبي متنتظِر
دانا من زمان بستنظرك
أشكي وجيعتي وافكرك
واوعى كلامي يعكرك
لسة بنات وفيه ولد
وفيه مرتب يعجبك
بعد الجنيه
مخد شراعُه وعامّ لِنا
وفيه مدارس والدروس
حبيبي كسره ضهرنا
أقول كمان
ولّاَ تقولّي سِرنا
ليه ناس بتعلَى م الهوا
واحنا تحت باللضا
قاعد مئآنس عندنا
قام الوطن ثاير وكاره شكونا
هوقل وبسمل
قلنا كُتر العيال
شئ ضرنا
لازم نزيد فى هجرنا !
ونصوم كتير أفيدلنا
واللضا يرحل من هنا
ضحك اللضا
شئ منطقي
بس يا خساره بِكِي
وَجِّه حديثُه للوطن
قال منطقي تعمل مهاد
لقعدِتي مع الغلابة ولمِتي
مفيش مكان
فى فيلتك أو قصر
يرضى بسحنتي ومحبتك
بتقول صيام
أحلى كلام
بس نصوم كلنا
مش احنا عِنوه بحظِنا
ونقول دي طاعة لربنا
ما النسل طاعة لربنا
وانته بيضرب الأدان
يا كُل حُمارنا مية سنه
زي الحُصان
دا مش بذخ
ولا دا برضُه مش بذخ
متقولنا
قول عليك وقول لنا
قول الصيام هوه الورع
كمل وقول إن الورع
إن الدوا حتى دروعنا
والغدا
من كل صنف عندنا
كمل وقول إن الجدع
ميستلفشي م العِدا
كمل وقولي يا وطن
كان ليه عمر
تحت الشجر
نايم بطولُه وجِبتُه
لا فيه حرس
ولا فيه غفر
حتى من نسلُّه عُمر
كان بينثُر الدهب
فوق الجبل
واحنا يحدفنا الزمن تحت الجبل
نقول كمان
يا وطن
ولا أخاف م الخطر
قول يا وطن .
إهداء / إلى العدالة الإجتماعية ٢
أحمد الصاوي مصر ١٧ / ٤ / ٢٠٢٠
ليست هناك تعليقات:
إرسال تعليق