يا مصر ليه
ببيع الصبر من يومي
وانا مصري
وأداري جروحي عن روحي
عشان تمشي وبضحك
لما يتكاتر فى يوم همي
وبغزل من خيوط صبري
أمل يُحضُّني
أو يُحضُن فى يوم قبري
عزيزه يا مصر يا بلدي
يا ناسيه اسمي
أنا إبنك
بقيت عاله على أرضك
بقيت هامش هنا فى أرضي
وراح فِكري
غريب تايه ما بين أصلي
وأصلك إنتي يا أرضي
قوليلي إنتي
فين حُضنك ؟
قوليلي إنتي
أيه سِرك
عشان يطرح هنا فجرك ؟
دفا من أمن
من خوفي ولُقمه
ع الرصيف تمري
أو كلمه
فى الطريق تهدي
ولمسه من وجع تشفي
قُولي إنتي
ليه أرضك هنا تحوي
يا مصر ليه
تِعبان شيطان
وشكلُه أيه؟!
وكام حمار
بيقولوا بيه
أو كام عجوز
على البُساط يرفع إيديه
وفى المصير
دُميه تلاقيه
وصُبح أيه نستنى فيه
طول م العجايز
قبرها فوق كرسي
متمسمّر عليه
ننّده فى مالطا
من زمن على الأمل
اللي الشباب بيشتهيه
يا مصر شوفي
دا الأمل
أو تور هنا وبتحلبيه !
يا مصر أيه
أخرتها أيه
غُصه وألم ولّا سوتيه
بتقولّي أيه
أكل الفقير ولا دا أيه
ولا دا سِم بتعمليه
لكام فقير
على الرصيف
مادد إيديه
مستني عدل
ومش لاقيه
ولا حيلاقيه
يا مصر ليه .
أحمد الصاوي مصر
١ / ٨ / ٢٠٢٠
ليست هناك تعليقات:
إرسال تعليق