ماتِتْأََمِّلش -الشاعرة منى عبد الرحمن

ماتِتْأََمِّلش

وأحيانا
تقابل ناس
تخلِّي الدنيا ف عيونك
كما الجنة
وتفرش لك شوارعها
حنين وورود
وتلقى الشوك كما الحنة
وحب كبير مالوهشي حدود
وترسم ع الحيطان جناحات
وجوه عيونهم الساهية
بساط للريح
شعاع بينور الواحات
وتدخل جوه قلب الحلم
وتتمشى ف ميادينه
وتعبر روحك الصامتة
سدود وسدود
وتركب ع البساط وتطير
وتوصل للسما الصافية
بقلب طريح
وتتلون سماك بالنور
وتلقى عيونك البنور
ماليها حياة
وحلم صريح
وفجأة يشق عينك طير
يرفرف فوق فروع الحلم
يقولك إصحى واتأمل
ياااااااعقل
الناس بتتجمل
فمتصدقش
مافيش جنة ف دنيا الآه
مافيش جناحات
مافيش واحات
وكله صحاري ياولداه
متتأملش ف الإنسان
يكون إنسان
متتأملش

منى عبد الرحمن