حُب جعان -الشاعر خالد عاطف ابو العزم

تتساوى الأشياء .. عندما يصبحُ الحبُ تثاؤبٌ .. بلا نوم 

حُب جعان

أنا قلبى هناك
عَندِك
وانتى مابتجيش
ومابينى وبينك .. سور
واتنين
وشاويش
مش قادر أعرف مين الحُر ؟ ..
ومين محبوس ؟ .
أنا وانتى اتنين
لقمه .. وغموس
مابنتجمّعش
كل اللى مابينى وبينك .. حب جعان
وكتير عريان
لكن مش حاسس أى خجل
إتنين مجانين ب يسوقوا عَجَل
من غير بدال
وبكل دلال
ب تقولى وعودك آيه ف آيه
إن انتى ف بُعدِك تبقى معايا
لو حتى نكون عصفور مدبوح
ما اسألشى ازّاى ده ح يبقى لُقا
ب تقولى ح تبقى .. حلاوة روح .
فاضل على أول قطر مسافر بينا .. مسافة موت
وبيوت مهدومه ..
فوق منها ساعات .. بالكوم .. واقفه .
وبشر يتحرّك ب الصَقفَه
وقمر مجنون
مستنى اتنين عُشّاق
ومجهِّز كرسيين .. ولمون
وشجَر .. مش شايل فوقه ورق
ف دموعُه غَرَق
من كُتر مانَحَتوا عليه - ب الكدب - قلوب
وانا ب افهم .. لكن بالمقلوب
ماعرفتش احط الشمس على القضبان
واركب
لو حتى النور الترسو
واتطوّق .. لو مالقيتش تذاكر ف الشبَّاك
أنا آخر قطر ركبته .. عنيكى
والرحله .. ذهاب .. ف ذهاب . ف ذهاب
مسموح من غير القلب إياب
يفضل محبوس
وانا وانتى اتنين
لقمه وغموس
مابنتجمّعش .. لإنى جبان
وح يفضل كل مابينى وبينك .. حب جعان .

خالد عاطف أبو العزم