عِد الخطاوي -الشاعر محمد البنا

عِد الخطاوي

عِد الخطاوي ودِبّها
ع الأرض يمكن تِنصفَك
إفرد دِراعَك ع المَلَأ
واكْبِّر إسْود المَمْلَكَه
وسط المْمَالِك توْصِفَك
خَلّيك في أرض المَعّرَكَة
فارِس و حارِس عِزْوِتَك
حافِض و دارِس سِكْتَك
لاجلٍ تكون إنت الوطَن
لسّيوْف بتِعّشَق ضْربتَك
واغزِل ضفاير مِن عَلَم
شارِب نَزيف مِن قبضتَك.
هوَّ اللي دافِع عَنْ وطَن
زي اللي هاتِك فَرْشِتَك؟!..
قَوِّي العزيمَه فـ ضربتك
وافرد في ضَهرك توجَعُه
وان كنت خايف م العقاب؟!
فـَ الخوف لوحدُه يشجعُه
،يهدم حجارِة قَلْعِتَك.....

ماتقولش كلب و عضني
ماقضْيش في عمري أجري وراه
"غاندي" أما قال هذا المثل؟!!
فـَ مكانش يقصُد حُرْمِتَك
،جوهر إزاز لو ينكسِر
،فـالباقي سهل تدورُه..
خَبّي ف إيديك سلو الوجع
وإوعاك ل عينهم تظهِرُه
،لو حتىٰ قرَّب ينّتِشي..
مهو لو مايصّبُرش الجدع
عُمر الأعادي ما تختشي
ولا ضَعف حيلتُه يطهرُه
ولا دمعُه يقدر يرتشي
ويبات و يسكُن مصدرُه
فان كنت دايس ع الوتر
بَكّي اللي سامِع عَزفِتَك
وان كنت ناوي المعركه
عِد الخطاوي ودِبّها
ع الأرض يمكن تِنصفَك

البنا