مابحبش أكبر
ويقولولى خلاص كبرتوأنا مش عارف أهرب من طفولتي
وجرى إية يا عمري
أنا كنت فاكر لسه بدري
أنا لسة مستني صحابي يجوا نلعب
ونجرى نهرب
لما نكسر شباك جيرانا .
ولسه فاكر عتاب أبويا
لما من مدرستي أزوغ
ما هو مش معادى .
وكان يقولى لما تكبر
ترفع رأسي وتبقى دكتور
وفاكر أمي لما تقولى
سامع كلام أبوك يلا وأكبر
ولسه فاكر أبقى أشطر
ويجبولى كل حاجة فيها سكر
وْان نمت بدري يحكولى قصة
والحق أصحي والعصافير لصوتها أسمع
ولصوت الفجر الله اكبر
لسه فاكر
ب يقولولى نديلك سؤال
من كتابك ويلا جاوب
نديلك سؤال في الحساب
خمسة في ستة وشغل دماغك .
لسه فاكر العيد لما هايجي
هايشترولى بدلة ظابط
وهاروح لبيت عمى
وبنت عمى اللى إتغاظت
وقال إية عايزة زى بدلة ظابط
ولسه فاكر خالي شالنى
وأدانى تعظيم سلام تمام يا فندم .
في طفولتي انا لسه عايش
وأعمل أية مابحبش أكبر
لسه عايز أشوف وشى
في مرايا بس أقصر
أنا لسه ببكى أصلى
أخويا خد منى لعبة
وهما بيحيلونى أسكت
وكل واحد في أيده رشوة
حلاوة يمكن أو قروش
لسه شايل كل لبسي
لسه مش عارف أمشي
ولسه خايف من الفلاش
أصلهم ب يأخدولى صورة .
ويقولولى خلاص كبرت
ولسه من الببرونة شارب
انا لسه ببكى
وأمي جاية تجرى تشلني
وأبويا يسأل بيكى ليه
طيب رضعية طيب نططية
يمكن يبطل طب هاتية
يمكن في حضني ينام ويحلم
ولسه مش عارف أسمى
انا لسه برضع
ولسه مش عارف
اوضتى في اى حتة بيسبونى
وفى إيدى إيه غير أنى أخضع
والله فاكر كل حاجة
ويقولولى خلاص كبرت
ولسه في اللفة بنام
وفي طفولتي لسه عايش
حتى نفسي أكل حاجات
ومستنى لحظة فطام
مابحبش أكبر
كلماتى إيهاب صابر
ليست هناك تعليقات:
إرسال تعليق