أنا مَلِّيت -مسابقة نبرات المداد لايف،الشاعرة منى عبد الرحمن

 مسابقة نبرات المداد لايف

أنا مَلِّيت

بتمشي ع الحنين بالْوَارْب
مِعَيِّشْني حياتي ف كَرْب
باعِيشَك يوم كَأنُّه حِتَّه م الجنة
و٦٠يوم ف هَم وحُزن يِسْتَنَّى
يبات مزروع ف نِن العين وأهْدَابْها
ويطرح دمْعَه حَرَّاقَة تشاهِد رُوحِي
وعَذَابْها
وتِيجي تاني م الأَوِل
بكلمة تغسل الأوجاع
تِطَمِّن روحي وعيونها
يادوب بارتاح وتهدى عيوني ودموعها
ألاقيك تاني م الأول
ف ٦٠يوم نكد وعياط
وقلبي م الوجع أهو شاط
أمانة ياشيخ بقه ارحمني
ياإمَّا تعيش ومِتْهنِّي بعيد عَنِّي
و تتوافق مع الأيام على ظُلْمِي
ياإمَّا تصالِح السِّكَة
وتزرع قلبك القاسي شوية حُب م الغالي
على حَبِّة حنين فَكَّة
يليق بحبيبة ف خيالَك
يوافق حِلم ف خيالي
فمن فضلَك
أبوس راسك
تِقَيِّدْني ف كُرَّاسَك
وطن مُشتاق لِضَمِّة قلبَك الدافي
ياريت تِسمع بصوت كافي
يِضُم حنيني ف عيونَك
وتمشي ع الحَنين بالشوق
ياإمَّا.....
تْرُوُق.... ورَيَّحْنِي
وخَلِّيك عَنِّي مِتَّاخِر
من الآخِر
أنا مَلِّيت

منى عبد الرحمن