كلمة سر
كلمة سر
اوعك تنقلها
خليك فاكر خدها وشِلها
كلمه بسيطه
بس عبيطه
لو هتفكر مره تقولها
كلمة حق
تجيبلك نُقطه
خُدها صريحه
واوعى الريحه
من ليل فاسد
فيه شبيّحه
مش بالسنجه
أو بالمطوه
شخص ببدله
ومعدول عدله
تبُص لشكلُه
تخُش الجنه
بعد ميُطلُب
ياد بشويه
تلقى لسانك عمّال ينطق
مالُه شيطانه
بريحة الجنه
يلّا تعالى وخُش أوام
على أرشيفنا
عشان الحال
يمشي شويه روتين موّال
تلقى الدُرج
شويه شويه
يفتح يلّا عشان الشاي
موّال خَارِب
لسا يا افندي
مطلّع قهوه ويّا الشاي
دا مش شُغلي
علشان يومك
يمشي ياواد زي الإسهال
ماشي يا باشا
ماشي الحال
أمتا أجيلك ولا أسيبك
تُظبُط ورقي
يلّا يا اخويه
استنى فى دورك
ويفوت شهر
الشهر الجاي
وكُلُه بقهوه ومُر وشاي
لكن العكس
وبُص ازاي
تيجي فاتوره تلت أضعاف
فيه للنور
وكمان للميّه
حلوه جميله بس تقيله
تدفع يلّا
ولّا بنفصل
كُل الخدمه لحد مترسِل
قرش الدوله
ياواد وبنِوصِل
كل الخدمه وحقك تُشكُر
إوعى تفكر
مره يا عنتر
تاخدك عزه فتقوم تُذكُر
عدلنا عايش
ولّا انا شايف عدل بيبكي
عايز كتفي
أو كاس ويسكي
أو ليله حمرا
بُص يا إبني إوعك تشكي
إحمد ربك
إنك عايش بُص لكِتفُه
شوف أيه شايل
شايل بلدك !
لازم يسكر
علشان ينسى تُقل الشيله
شايل خوفو
ولّا دا خفرع
ولّا دا راتب طلقة مدفع
بُصي يا روحي
إوعي تنوحي
يوم ما تشوفي
حمو خطيبك
يرمي بنفسُه
وِسط النيل
علشان شقه
بحتة أوضا وصاله ومطبخ
آخر دور
بُص وقارن
جُحر بقصر بُص وقارن
دا انتا فى مصر
إوعى تقوّلي
ناس درجات
سُنة ربي ليوم الحشر
طبعاً عارف
بس يا شيخنا
هوا العدل لناس بالحصر
واحنا بسُنه
تحت الصفر
ولا بصقفه تخُش القصر
قوّلي يا شيخنا
إوعك تنسى
إزاي أبقى عديم الدخل
وبرضك راتب
أهل القصر
مني يا شيخنا علشان مصر
شكل ضرايب
وكمان دمغه
ويّا رسومنا لكلمه فى سطر
حتى القبر
بتدفع نثر
الشاعر / أحمد الصاوي
مصر ١٤ / ٧ / ٢٠٢٠
ليست هناك تعليقات:
إرسال تعليق