عصافيري مراسيلي
كل ما اشتاقله
وقلبي يحنله
ويدق له ..
وير قله ...
تفلت قوام
من بين ضلوعي
المشتقاله
عصافير قلبي
وترفرف في الحال
وتجري قوام..
لحبيبي اللي غايب
عني ..
حاملاله مراسيلي..
وهمساتي ..
وأشواقي ..
وبسماتي ..
وضحكاتي ..
ولهفتي عليه ..
وحنيني ..
ووياهم غرامي
وكلامي و سلامي..
وتقوله عني
وهيا تزقزقله
وبجناحاتها
ترفرفله ..
في مراسيلي
ليك يا غالي
هناك قلب
لسه بيستناك
ومشتاقلك
وبيحنلك..
وبيهواك ..
ومستني ليه
رجعتك..
ودخلتك ..
عليه ...
من بيبان
قلبه المشتاقة..
لدقتك ..
وللمستك ..
على جناحات قلبي
المرفرفة ...
ورقتك ..
وتمسح دموعي
اللي بلت
في غيابك ..
مناديلي ..
وأستني منه
مراسيله
تجيني
على جناحات
عصافيري..
اللي راحتله
فرحانة ...
تغردله..
غناويَّا له
ومواويلي ..
وفي يوم
رجعلي عصفور
من عصافيري
حزين .. باكي
بجناح ضعيف
مكسور...
وشاكي ..
وحط على إيدي
زي ما حطت
باقي عصافيري
وشكالي من حبيبي
اللي رمى منه
مراسيلي...
وقال له..
لا ترجع ليا تاني
ولا منها بمراسيل
تجيني...
وغرد حبيبي...
مع عصافير غيري
مكان عصافيري ...
ورجعتلي باقي
عصافيري
قبل ما توصله
ترفرف حواليَّا
وتغنيلي..
عشان تفرحنا أنا
وعصفوري
الباكي الحزين
عشان أنسى
أنا وهُوَّ
غدر حبيبي
وسلامه المجروح
ليا على جناح
مكسور لعصفوري
اللي كان يجي
بيني وبينه بسلام
وهيام .. ويروح
واللي حط على إيدي
وقللي بزقزقة
حزينة....
خسارة فيه
حبك الغالي
ولا ترسليني
تاني له بمراسيلك
بعد ما طوح
منه مراسيلي
وغرد بحبه..
ومراسيله...
مع عصافير
تانية
غير عصافيري...
محمد عبد النعيم
٢٠٢٠/٧/١١م
ليست هناك تعليقات:
إرسال تعليق