عشان بحبه -الشاعر د.سعيد عبد العال

عشان بحبه

عشان بحبه
طلبت أشوفه
قام صددني يا ناس بخوفه
خاف يقولي
على الحقيقة
و انى لسه في قلبه
بالثواني و الدقيقة
و ان طيفي ويا طيفه
و ان قلبه كمان مايلي
و عقله بيفكر تملي
يعترفلي بالحقيقة
بس كان موجوع بخوفه
خوفه لاهرب من جنانه
و اني مش هحتاج حنانه
يمكن كمان اكره اشوفه
خوفه كان حاكم تملي
قبل ما يفكر يقولي
كان بيهرب بالطريقة
و بعد كام مليون دقيقة
قمت قافشة فيه و ماسكه
ايه يا عم اديني سكة
دي احنا حلوين دي الحقيقة
يعني سهل في الكلام
خف كده و ابعت سلام
قول لابويا فلان جايلك
لاجل يخطب يد بنتك
قلت ايه؟
سكت ليه؟!
هو انا فعلا جريئه
بس دى كانت الطريقة
ما انت مش راجل تمام
حتي مستخسر كلام
فـ اللي بكره انا المدام
قوم يا راجل شد حيلك
قول لابويا ضيف جاييلك
هو انا بشحت عريس
اوعي تحسب اني
عانس او فطيس
انا بس مستخسراني
لحد تاني يكون عريس
و انت في الحته الشمال
و اني يعني بت عال
ينضرب بيا المثال
و اني حزت الحسن كله و الجمال
روحي رقيقة
هي دي كل الحقيقة
اه جريئة
بس حشمة
و الكلام عندي بحساب
و المعاني تكون دقيقة
يعني مـ الاخر
تشهل
حسني زاد
و الناس خنيقة
كل جمعه يجلنا ضيف
لما بقي شكلي سخيف
و النوبة دي زادوا حيرتي
اصلهم جابم فـ سيرتي
و انت طبعا تزعل عليا
تعمل ايه
شهل شويه
المهم تشوف طريقة

د سعيد عبدالعال