فى فقهِ اللغةِ الحديثِ لا فرقَ بين .. طوبى .. وطوبه .. مادامت للفقراء
مولانا أبو المساكين *
فاضل عليك يا ربيع حداشَر خريف
مطلوب براءه ..
مين ضميرُه نضيف ؟ .
الكل طامع ..
والشيطان .. واقف .
يمسك ف إيدُه الموت ..
وهات .. تحديف .
اللى قالوا لَك جيت .. ب يشتَغَلوك
لابد ح يربّونا ..
ويربّوك .
لازم تقول حقّى ب ورَق شَجَرى
تجرى ..
وإحنا من وراك نجرى .
نظهر لصوص ..
وآخرنا يبقى كلابش
ويضربونا عيار قديم .. وماخابش
الريح .. ف وقت الجَد .. ماتطبطبش
إذا كان ضرورى تعيش ..
تعيش خماسين .
وتكون تراب .. ف قلوبنا يعمى العين
ونكون قلوب .. عبرى ب لسان عربى
وقت الشروق يا شمس تتقلبى
وتبقى ليل ..
لانجمه فيه .. ولاقمر
ب ( سِنت ) واحد .. يبقى طن البشر
والجمله .. مع أسعار أكيد خاصّه
من غير ما نسمع كلمة اتوصَّى
الطن .. فوقُه كيلو م الشاطئ
ودعوتين من قلب متواطئ
إتوضّى خمرَه ..
وصلّى جوَّه البار .
وعاش ف بيت يشبه لجُحر الفار
لكن محاوطُه السلك والأسوار
يفزع بشده .. لو افتكَر ميادين
ويبقى مولانا أبو المساكين
خايف عليهم زَهوة العيشه
يتفَقروا ..
لازم يلبسوا الخيشَه .
الدنيا عَلقَه .. زى غيرها تفوت
مادام ضَمنَّا الجَنَّه بعد الموت
اللقمه فيها .. تسوى ألف رغيف
الله عليك ..
ما أعدلَك ياخريف .
انت البرئ ..
وإحنا ضميرنا نضيف .
قول للشيطان اللى احنا عاشقينه
يمسك ف إيدُه الموت ..
وهات تحديف .
ليست هناك تعليقات:
إرسال تعليق