تعبان من كتر التخبيط -الشاعرة وسام عبده

تعبان من كتر التخبيط
وبترزع راسك فى الحيط
على وشك مكتوب (ده عبيط)
حدوتك ولاحد فاهمها

مش قادر تخدع بتبان
فى الآخر دايما أنسان
فى الدنيا دى مالكش مكان
كوابيسها ليلاتى بتحلمها

الغلطة فى طيبتك مع كون
معجون بالكدب و١٠٠ لون
وطبيعى بتظهر مجنون
كده لازم طيبتك تكتمها

ليه حاسس دايما بمرارة
صدقنى ناجح بجدارة
تخبيطك فى الدنيا أشارة
أن انت النية مسلمها

ارتاح من كتر التفكير
ماكفاية لك رب كبير
ادعيله وركز بضمير
مع نفسك قادر تحسمها

خليهم يشبعوا تخطيط
فى ذنوبهم حلو التوريط
وافرح انك حد بسيط
وشهادتك بالختم أختمها
 

وسام عبده