ثلاثُ سنواتٍ مَرَّت على كتابتها .. ولايزالُ وقعها على قلبى نفسُ الوقعِ حين كتبتُها .
فيروز
ع الدنيا ب انادى
واضحك بسذاجه
وانا ب اكْوى قميص الشجن العادى
واسمع صوت فيروز ب يغنِّى ل شادى
ماانا برضو عجوز
قتلتنى الدنيا صحيح ..
لكن .. قلبى ماكبرش .
ب يدوب التَلج
ويخلِّى صحارى الدنيا بَوَادى
وبانام فرحان
واحلَم .. واحلَم
أحلَم ألوان
فى الحلم إمبارح كان قاعد حنا السكران .
البوسته خلاص
خلصت عداوتها مع المسافات
الدنيا سابتها ..
لكن هيا مسكت فينا .
أنا وانتى طوابع ملزوقه ف أقدم جوابات
ب نقوم .. ونبات
ونغنى ساعات
ونجوِّز بكره لأحلامنا
وتعيش فى تَبَات
ونحِس بحزن اما تخلِّف ..
صبيان أيتام
وبواقى بنات .
إتذكَّرتِك.. وانا واقف فوق المَفرَق
ماسك صُحبة ورد
الدنيا ب تشتى
والعمر ب يشتى
وانا ب ادخُل جنة صوتِك ..
أتدفَّى من البرد .
ولاعدِّت ناس
ولاقَعَدِت ناس
أنا واقف أحلامى ب تنداس
ب اتعاير وسط اجواز الطير
يقولولى ........ يافَرد !!!
..........................
الزمن اتغيِّر يافيروز
أحلامنا تصيِّف وتشتِّى زى امَّا يعوز
وقلوب الناس ..
كَفَرِت بالورد ..
ومرتاحه عل شجر الموز !!!!
..........................
لكن ب يحبُّوا يشوفوا لُقانا
ويغَنُّوا معانا
أنا وانتى بقينا العرض المجانى !!!!!
عرض الأراجوز .
خالد عاطف أبو العزم
من ديوان بوكيه الدمع
ليست هناك تعليقات:
إرسال تعليق