إختر الصفرَ الذى يناسبك .. أمامكَ ألفُ صفر .
تَرزى كَفيف
أنا عايز ترزى ..
يفصَّل حلم مقاسى .
ب جيوب .. ب تكون مخرومه ..
لو اتحطّت فيها الاحزان .
أعرف أقيّفها .. ف وقت الضيق
أو وقت امّا اتحاصر .. ف طريق
أو لمَّا اتخان .
أنا عايز حلم قماش
مُبهِج .. ان شالَّه يكون بَكَّاش
ياكل ب مشاعرى حلاوه
ويبان .. بقلاوه .
مايكونش ب لون الدم ..
على الأحلام الشاش .
أنا عايز أغمّض عينى .. أشوفك واقفه
مش وانتى ب تجرى ..
وجَرَّه الدنيا وراكى .
وف شنطة إيدك قلبى ، ..
وحُبِّك ، ..
والوعد الغشَّاش .
ماقدرتش أفهم .. ليه قلبك زحمه ؟
ورصاصة حُبِّك ..
ليه تبقى رصاصة رحمه ؟
ليه بعد ماتضرب .. لسلاحك ترجع
ويموت القلب ..
إنمّا هيا .. ب تفضل توجع
وألاقى وصالك غالى ..
وبُعدِك .. ببلاش .
أنا عايز ترزى كفيف
مايشوفشى دموعى
ولا كام مشرط مضروب ف ضلوعى
ويقول .. مهما تغطّيها ح تفضل عاريه !!
ويقدّم .. من باب الصَدَقَه الجاريه !!
ع القلب الميت .. حبة قمح ياكلها الطير !!
أو يعمل على روح الإحساس .. كولدير !!
أو يرمى شوية صبر .. ف جرح قديم
ويقول مش وَحدك
م الجِِد الألف
المصرى ف حجر امُّه يتيم
إتجمّز بالأحلام ..
وكإنك كَلت التين .
واذا دَمَعِت عينك كون بكَّاش
إبن امَّك .. من يومُه الغشاش
وجروحك .. لو فاضت بالدم
إضحك
ويادوب .. لفّها بالشاش .
هناك مثل شعبى مصرى قديم يقول .. إتجمِّز بالجمّيز لمّا يجيلك التين .. بمعنى تناول الجميز( وهو ثمرٌ قليل القيمه ) حتى تحصل على التين .
كولدير : مُبرِّد مياه
خالد عاطف أبو العزم
ليست هناك تعليقات:
إرسال تعليق