ياما افرحي
ابنك بطل
ابنك شهيد
عريس في الجنة ياما
و في بدلة ميري اترفع لسابع سما
ياما افرحي أنا هفطر في الجنة
تعرفي في اللحظة اللي كنت بقول فيها الشهادة
كنت بقول دي بركة دُعاكي يا غالية
آه والله دي بركة دُعاكي في ساعة استجابة
كنت رافع سلاحي على كتفي
و بنحضر فطارنا أنا وأخواتي
لكن متوقعناش إن القلوب الغدارة
هتهجم بكل حقارة وتفجرنا بعبوة ناسفة
فاكرة ياما كان فرح أصحابي السنة اللي فاتت بردوا في رمضان
وكنت بقول يااااااااه دا أحلى فرح
أصحابي بقوا عرسان في الجنة
وفي الشهر الكريم
ياربي أرجوك متغضبش علي
واجعلني معهم أجمعين
مكنتش اعرف يا غالية إن ربي قبل دُعايا وبظرف سنة هكون معاهم عريس ياما
افرحي يا غالية
ابنك بطل
شهيد في الجنة و مستنيكي
ابنك بطل دافع لآخر لحظة في عمره عن أرض بلده
عن أرض الفيروز الغالية
واعرفي ياما بكرة هيجي مكاني ألف وهتفضل سينا
عصية على كل العدا
ياما افرحي و علقي علم بلدنا الحبيب في أوضتي
وكل يوم افتكريني و اديله
تعظيم سلام زي ما كنت دايما بديله السلام
افرحي ياما ابنك بطل شهيد
ليست هناك تعليقات:
إرسال تعليق