قصيدة صمت - الشاعر خالد عاطف ابو العزم

باقٍ من الليلِ ساعةً .. ربما يمكننى الموتُ دونَ أرق

قصيدة صمت

إطلع من قلبى شويه ..
تَعبت .
العمر سكن على راسى ..
وشيبت
حُبَك يا محمد عايز قلب شباب
وانا شوفتك .. بعد العمر ماغاب
ماعرفتش اكون عنوان لكتاب
ودخَلت مدارس يامه .. وخيبت
أنا وسط ساعات الدنيا ..
بقيت عَقرب عطلان
مشروع إنسان
حبة رسومات لمبانى بقت تحت التشطيب
لعبة تحطيب
الخاسر .. خاسر
والكسبان .. خسران !!
أخرس .. معمول تمثالُه .. لسان !!
أجمل أشعاره قصيدة صمت
يتمنى يكون شاهد ع العصر
ويعيش من بعد هزايم .. نصر
ويموت إنسان
مش زى الخلق ف مصر
ويسيبك فارد طولك .. بس
ب يقولوا الفرح شيطان !!!
عايزك تتمَس
الدنيا ماهيش فيلم نشوفُه
لازم يتحَس
أنا عايزك تعشق .. بس ماتتعذبش
وتقول الحق .. ماتتكدّبش
وف وقت الضعف .. ماتستغلبش
البُكا .. مش عيب
ولافقر الجيب
العيب .. من خوفك ماتنامشى
وتوطّى عشان الريح تمشى ..
وتقول ملاعيب .
مش عارف ليه
مع إنى مقدم ليك عمرى
مش بس السبت
مادخلتش حرب ف حُبك .. إلا وانتَ كسبت !!
مع بوسه وحيده لإيدى .. ب احس ب جوع !!
مش ب اشبع إلا امّا ب تحضن صدرى الموجوع
قلبى العريان تبقا لُه ضلوع
واذا شالوا عنيَّا .. ما اكونش ضرير
ب اوصيك يا محمد بيك ..
وبقلبك .. خير
وادعي لَك .. رزقك يشبه رزق الطير
جناحاتك .. تفضل حُرَّه ..
تطير ف بلاد الله
خلّيك ويّاه
واحفظنى ف روحك ..
وح ادِلّك لو قلبك تاه .

خالد عاطف أبو العزم