الى الابنودى فى عيد ميلاده
ياخال
الحال ادحتر
بقى غير الحال
جانا وبا من بلاده ينط
لو جابلوه حراجى القط
ومعاه عمال السد
مش حيتهد
والحال خلقة مال
لا عاد فيه ارض
ولا عاد فيه عيال
ولا طنطن ولا طنطان
كتر قوى القيل والقال
الجامع بقى بس للادان
ولا بيقول 'حى على الصلاة'
ولا بنسمع 'حى على الفلاح'
وتصلى فى اى مكان
يا ابو الغنوة والموال
كلمة حلوة تتقال
وحرف ع السطر بيضوى يشق الغمة
تنور
ويجرى ويلعب ويتعجبن ويتمخطر
سلسال ورا سلسال
لا عاد فيه غناوى
ولا عاد فيه موال
غناوى دلعة ما فيهاش حكاوى
ولا معنى يشد الغاوى
مش زى غناويك انت وعبد الحليم
غنا يجيب مغص كلاوى
بدال ما يغنوا للورد
بيغنوا للقطط والكلاب والحمير
ويقولوا رميت البرسيم
كل صوت يطلع علينا
حالته قحط
ازفت من الجيم
يوووه يا خال
ولا حد بيقول السيرة ع الربابة
هما اصلا قفلوا القهاوى
والناس على امرها مغلوبة
حالها ضنك
كل واحد سنكر عليه بابه وسك
ولا عادتش حاجة تمام
نظام بيجر نظام
قسمة علينا مكتوبة
وربك العلام
يا خال
جانا زمن غير الزمان
الكل فيه متهان
الناس بقت شغلتها فتاوى
والشعر
يووووووه
اقولك ايه ولا ايه ولا ايه
كل اللى كتبله بيتين مخربطين
خلاص بقى شاعر
عاوزله بس ربابة ويدور يشعر
بقت بوابة لا ليها حارس ولا مفتاح
زمن الشعر راح
بقولك يا خال
ان كنت بتفكر ف حالنا ولا عاوز تاجى
تشوف حالنا ومحتالنا
واللى جرى واللى ح يجرالنا
يعنى ان كنت ناوى
الحلم مبقاش حلم
مع انه نفس الحلم
معادتش صالب طوله على عوده
وصفر وبقى لونه مخطوف
خن واترخى. وتر
عوده
مش راضى ابدا يتشد
وبحرنا ميته دلعت
راح صفاها واتعكر
ولا فيه جزر ولا مد
يا خال صبرنا طول وطال
ع العيشة اللى ع القد
ايامنا لابسة توب الخوف
باينلها خلاص
كنها نهاية الفيلم
باين قيامتنا قربت
خليك عندك احسن مرتاح.
لو جيت مش حتعرف تصول وتجول
حتزعل قوى وتطق
بس ربك والحق
انت وحشتنا يا خال
ليست هناك تعليقات:
إرسال تعليق