خُرم إبره
عندما توصدُ الابوابُ نحتاجُ لرفقةِ جنِّيَّةَ الأحلامِ المتمرده .
الليل مشى
وساب وراه ليل ابن عَمُّه !!
مافيش يمام .. ب يطير .. وب يسبَّح
ولا حتى فيه برغوت .. تقول على قد دَمُّه
فاضيه الشوارع والقلوب م البشر
الدنيا جِنِّى .. ف خُرم إبرَه اتحشَر !!
بقا خيط مولّع .. يوصِل الفراغات !!
وكل ساعه يقدم الإثبات
إن ابن آدم يشبه الشيشه !!
دخان حبيس ب يئن م العيشَه !!
الحلم عندُه ب يشبه الرفَّاص !!
قُبلِة حياه .. لو كَتَمِت الأنفاس !!
والقلب ما استحملشى نار الفحم
وبقينا لابسين .. الهموم .. ع اللحم !!
أرواحنا تبقى عايزه حبة شحم !!
وصنفره للتقوى .. حدادى !!
مع النشيد الوطنى لبلادى
وتحيا .. تحيا .. تلاته .. لو .. تحيا !!
مدد ياروح الميته الصاحيه .
مافيش ورق ولا ورد فوق الشجر
( ابواليزيد ) قاعد ف ( وادى القمر )
مالقاش بَشر .. قام حَب جنِّيه
وفَك قلبُه .. شوق .. وحنّيه
وقال : برئ من ضلمتك ياوجود
أنا حبل سُرّى .. والكلام مولود
من غير سبوع .. ولاملح .. ولا شمعه
مافيش موغات
ب نشرب الدمعه .
وادى القمر .. وادى .. وقلبُك قمر
بيقول مازال ف الدنيا .. ريحة بَشَر
الحَبه منها .. فيها ميت حَبه
قمحك إلهى ف أرضك الشابَّه
والدنيا عايقه ..
جوزها كل عجوز .
حلمت سفاحاً ..
خلِّفت أراجوز .
بقى المليك .. المالك .. المملوك !!
ابن الحلال .. الفاجر .. الصعلوك !!
وهو برضو النسر .. والجيفه !!
من الغرور والجهل توليفه !!
عالى المقام .. أوطى من الكاحل !!
ملك ملوك الأرض والساحل !!
مالك قبور الميتين صدَقَه !!
والمدبوحين أُضحيه للأسياد .
زادت رسوم الفرح ف الأعياد
بقا ابن آدم يشبه الشيشه
دخان حبيس .. ب يئن م العيشه
الحلم عنده ب يشبه الرفاص
وقلبه لو يتقَل .. يكون ريشه !!
الرفَّاص .. هو جزء صغير فى الشيشه يستخدم لإخراج الدخان الحبيس
أبو اليزيد .. هو الشاعر الجميل أبو اليزيد جيفارا
وادى القمر .. أحد أحياء الإسكندريه
ليست هناك تعليقات:
إرسال تعليق