مواسير
الأرواحُ .. كالحديدِ .. عندما تَبتُّل .. تَرفُلُ فى الصدأ
شوال بطاطس .. إحنا .. جوّه السوق
مرشوش .. كيماوى .. وسم .. للى يدوق
منفوخ صناعى .. ب هرمونات ال أنا !!
جوّاه معطَّن .. قبل شكله .. ب سنه !!
غربان تبيعه .. ل مشترى .. ميت !!
سَوأة هابيل ف الطَل ب بتبيَّت !!
وقابيل .. ب يدفن قلبُه ف الحُفره !!
يضُم جيشُه .. كل مِن يكرَه !!
وكل مِن بيظيط مع الجلجله !!
يسد ودنُه ف سورة الزلزله !!
شايف رجوع الحق .. م البلبله !!
يستوجب الحسم السريع .. والقهر !!
جمعيه تبدأ كل أول شهر
وتبقى رحمه ونور .. على الأحلام !!
وكل مِن حاول يكون قُدَّأم
وماكانش واقف ف الطابور الزور
أو اتظبط مش لابس الطرطور
ولا ماشى فوق الحَبل رايح جاى .
أنا ياحبيبتى زى تِفل الشاى
لا هو اتشَرَب .. ولا غاب عن المشهَد
عندى الشجاعه أعترف .. واشهد
إنى اشتريت الصمت بالغالى
وكنت زى الميَّه ف العالى
سابت يادوب ذكراها ف المواسير
واتقدّمِت ف القهوه والمواخير
كماله للمنظر .. ومجّانى
سهم ب بلاش ف البورصه .. للجانى !!
وقَرض متبدد على دَفْعُه
ماتت فوايدُه ..
واتقَطَع نَفْعُه .
ب يحب عاقر ..
قالوا ولّاده .
وعليه سداد المَهر .. كالعاده
بس ف فَرح .. على هيئة الميتَم !!
كل اللى فيه ملبوس ومتشيطن !!
النور مِطفَّى .. واللى قايد .. نار !!
مجوس بياكلوا التورته مع كُفَّار !!
وانا وانتى .. نلحس .. ف الطباق .. والورق
يمكن نرجَّع عمرنا إللى اتسرق
بمزاجنا .. واتجنن .. وجننَّا
وساب لنا إبليس .. يعشّمنا
ب قُبَّه خضرا .. هوَّا فيها الولى !!
العاشق .. المنجلى !!
الكافر .. الحنبلى !!
إللى معاه مفاتيحنا .. والشَفرَه
وشايفنا سَوأه .. مكانها ف الحُفرَه
ليست هناك تعليقات:
إرسال تعليق