كُلُّه تَمام -الشاعرة منى عبد الرحمن

كُلُّه تَمام

عَامْلَة إيه؟
الحمد لله كويسة
حَبِّة خُدوش ف القلب على حَبِّة وجع
على كَام حِفَان خَنْقَة
واقفين فِ زُور الحِلم
وَيَّا انْكِسار فِ الرُوح مع حُزنها لَمَّا ارْتَجَع
ودَم يبوح بأحلامُه فايِنْزِف عُمْر بِيْعَيَّط
ودَمْعِة عين بتِشْكي الظُلم
ورِمْش ف حُزنُه بِيْخَيَّط
وأحوالِك؟
تمام جدا بِحَوْل اللَّه
مافيش ولا حِس ولامُبالاه
وعايشة أهُه
وباتفرج على خَيالات
مناظِر ماشية قُدامي
ومُش عارفة
حَقيقة بجد.... ولَّا صُور وحَاجَات
وباكُل بَرضُه مَع إنِّي
لادَايقة حِلو ولاحادِق ولاحَاسَّة بِطَعم الزَاد
واهُه عَايْشَة
وكُلُّه تمام ..لكِن عَارِف!!
أنا عايشة ف قلب تابوت
وعُمْر يْفُوت
مافيش ولاوَهْم ولاأحْلام
وكُلُّه تمام بِحَوْل اللَّه

منى عبد الرحمن