جميلٌ أن يرتدى القبحُ ثوبَ الوقاحةِ
باب 14
باب 14مش باب أبداً
ده حاجات تانية
تقدر بسهولة تقول .. يشبة صندوق الدنيا
كفيار .. مع أكل كلاب .. وقطط
حواديت .. أفكار .. سرقات .. وخطط
وبشر صنفين .. عادة .. ومسخوط
وحاجات لو كَلْهَا الميت .. تانى يموت
حافيين دخلوه
رَكَبوا الطيّارة
خلّونا حجارة .. ب نترصَص على الشيشة
وساعات ب نكونوا أمَارة
لوطن مفروك
ملفوف .. ف سيجارة
الناس جواه .. تحلم بالطول
وتنام .. بالعرض !!
مع ريحة ب تسطل طوب الأرض
ونقول تحيا
من غير مابنعرف مين تحيا !!
كرّاس ..
صفحاته ب تتسطّر ناحية وناحية .
ونشغبط فيه
على ما نقدر
يفضل فاضى !!
كل المكتوب جوّاه ماضى !!
ولا فعل مضارع جاى
أو حتى نوى !!
وكأن الناس العايشَة هوا
طالع من مَيَّه ب تتسخَّن جوَّه القِدرَة
تنفخ منطاد ..
ب يطير .. و ب يسقط .. من شَكِّة إبرة !!
وبكل ما فيه من خوف ووجع
يصرخ .. أنا جَدَع
ويقضّى حياته يطير ويرقَّع ف المنطاد
الناس .. مش يامة ..
يادوب .. قصة بليدة ب تتعاد .
كرهتنا حروفها ..
وصَرَخِت يامَه : كفاية ملل
ح تجيبوا لدود الأرض شلل
ولطوبها جُزام .
باب 14 يشبه ليكى تمام
من غير إحساس
- مع إنّه زحام -
متزوّوق زيّك .. لكن مش ليّا
وب يسكن كل عيون الناس
إلَّا عنيّا !!
زيك بالظبط امّا تجينى ..
واكون مش عايز
لو جايبه الدنيا ف حضنك .. مش فايز
ولا قادر ابص ف عينك حتى مجاملة
وكأنى ولد متخبّى .. وعامل عَمْلَة !!
ومجرد إنى أشوفك تبقى جريمة
باب 14 زيك بالظبط .. هزيمه
وماشوفتش غيرها معاكى حاجات تانية
ب ادخل جواكى يادوب فُرجَة
و ب اقضّى الباقى ف عمرى ..
ف صندوق الدنيا .
باب 14 : هو أشهر أبواب ميناء الإسكندريه .
الجُزام : مرض بشع يُعزَل من يمرض به فى مستعمرات ولا علاج له .
خالد عاطف أبو العزم
ليست هناك تعليقات:
إرسال تعليق