لسة الحلم معاند فيه -الشاعر د.سعيد عبد العال

فاكرة لما كنا بنتقابـل
زمان صدفة
أسيبك جرى و اتخفي
و قلبي يطير من اللهفة
لاني ببقي مش طايل
أقول حبيت
و كنت ياريت
يا ريتني يا ريت
قابلتك مع قلبي
و عرفتك كمان حبي
مكنش مصيرنا نتقابل بعد سنين
أنا عرفك و نكراني
لأن ملامحي قال كبرت
ما هو انتِ كمان
ملامحك لسة كما كانت
لا يوم هونتي و لا هانت
دي غلطتي اني
جريت م الشارع التاني
جريت و لهفتي لسة
معنداني و سبقاني
و عند الكل فضحاني
و لسة عنيكي شيفاني
ابن الجيران ابوه سابه وحداني
او بالاحرى مشافتنيش

عايش ميت
لسة الحلم معاند فيه
لسة الروح جواه
و القلب النابض جوا ضلوعه
رافض يترك خيط الحب
الدايب فيه
حتي عينيه
بتسلم كل صباح بوسة حب
لجل عيون البت الحلوة
الرافضة ايديه
طب يعمل ايه
ينسي الحب
ينسي يحب
و ينساها ليه
ما هو طول العمر الضايع منه
كانت وياه
عينه في عينها
و هي بحالها في قلب فؤاده النابض
جوا ضلوعه الرافضة تكمل
و هيعمل ايه
رأيكم ايه؟!