حَدّوتَه ف السَهرَه

لم يكن يملكُ سواكِ .. إدَّخَر منكِ نظرتينِ وعناقاً .. عندما أعلنت هيئةُ أرصادِ العمرِ أنَ شتاءهُ قارس .

حَدّوتَه ف السَهرَة

الراية .. كانت حمرا ع الشاطئ
مش للنزول ..
السوده متقطّعه .
الفِعل .. خاطئ ..
والسكوت .. خاطئ .
والريح ب تعصف من جهات أربعه
إزّاى أشبّك إيدى ف الرمله ؟
وكأن قلبى كان عَمَل عَملَه !!
لمّا استجارِك ..
لفّتيه بالخيط !!
ف عِلبَه فوقها فيونكتين وشريط !!
تنفع هديه ف ( الفَلَانتَين ) !!
لأى عابر ..
أو صديق خاين .
أو للمفيش خالص .. ف لحظة ملل !!
الحب .. يبقى طفل .. وقت البَلَل !!
يلزَم لُه لِبس جديد .. وحَفّاضه !!
لازم .. ب سُرعه .. كإنها رياضه !!
ترفع مناعتِك م الزَهَق والضجَر !!
تهزّى قلبك ..
يسقط اكبر قمر .
يسقَط رُطَب ..
لكن رُطَب مسموم .
مكتوب عليه .. إنُّه قتيل اليوم !!
إنتاج مصانع هَوَسِك المحموم
ب ضَلمَه .. وقت الدنيا ماتنوّر
ونار ب تولع .. فى شجَر أخضر
مالحقش يكتب للطيور أغانيه
البحر .. رجَّع فوقى كل مافيه !!
من غرقانين .. يتباعوا شوى وقلى !!
ل وعود .. كلام ..
ب يكون يادوبك .. هَرى .
ب يسلّى .. زى اللب ف السهره !!
ومركبين ع الشط م القَهرَه
متخرَّمين شبَه البشر والصَخَر !!
أنا لسّه واقف .. بس مش ح انتظر
حاسس كأنى كيان .. بدون حيّز
والنار لابتفرّق ولا تميّز
لحظة ماتولع .. بين ورق .. أو حطب
خبّيت ف جيبى
- لمّا قلبى اتنهب -
حبة دفا ف حضنك .. ف ساعة صفا
وشوق عيونك .. قبل مايختَفا
داخل سباق .. خيّال بلا مُهرَه !!
يجرى ل وَرا ..
متغمّى بالقَهرَه .
ولمَّا ح اخسر .. بالدموع .. أحكى
حدوته .. زى اللب .. ف السَهرة .

خالد عاطف أبو العزم