على شَط نهر الاشتياق -الشاعرة منى عبد الرحمن

على شَط نهر الاشتياق

وجَف نهر الاشتياق
مبقاش في غير حبة رِمال
تِتْمَشَّى ف عيون الِّلي فات
حَبِّة فُتات
بِتْجَرَّح النِّنِّي بِتِجْرَحْنِي
كل امَّا يِخْبَطْها الهَوي
والحُب والأحلام سَوَى
تِنْزِل ف قلب الضِيق
نهر الرِمال أصْبَح غرِيق
كل الحُروف فيه ذكريات
يتْمَشَّى ف دموعها الوجع
حَد المَمَات
كل المعاني جَلِّدِت
كل المشاعر سُوقْها فَات
حتى القلوب
باعِت محاصيل الهَوى
ف أرض الشَتَات
ووقَفْنا على جِسر الفُراق
الرُوح تشاوِر من بعيد
تِلمَح خيالها ف الرِمال
مادِد إيديه
بيلمِس الحِلم الشَريد
علي شَط نهر الاشتياق

منى عبد الرحمن