نداء للنيل
تعالَلَنَا يانِيل ..
فياض بِمَيِتك
لا يحوشك عنا سَدْ
ولا يحرمنا منك حَدْ
واروي عطشنا يا نيل
وسمعنا يا ناي ..
والنيل لينا جاي ..
صوت السواقي
والمواويل...
على جيته...
عايمة بين شطينه
ميته...
وإطربنا بغنوتك
يا مغنواتي..
يا بلدياتي ..
عن جمال مشيته
بين شطينه..
وهُوَّ شايل ميته
تطل عليه الجناين
والدوم والجميز
والنخيل...
القصير والطويل
وشَبْعْ أرضنا
يا نيل بِحِلّو ميتك
وخلينا نفرح بزقوتك
دي قلوبنا يا نِيل
تدق مع دقات خطوتك
وتفرح وترفرف
بين الضلوع
زي طير البراري
وعصافيرك ...
فرحانة بجيتك
وإنتَ عمران وفياض
وبين شطيك
ماشي بتتمايل
وإنتَ في طريقك
الطويل يا نيل
ألى آخر سِكتك
من منبعك..
وابنك يا نيل
هُوَّ المصري الأصيل
واقف في أرضه
تحت ظل عِمته
بتوبه الطويل
أبوكم واسع ..
وبال رايق
وصدر واسع ..
وبعزمه وبهمته
وبشوقه ولهفته
ماسك في إيده فاسه
ورافع راسه
تحت الشمس
الحامية في صيفها
والدافية في شتاها
مستني جيتك
بحلو ميتك
بعد ما عزق أرضه
وبذر قطنه وقمحه
وكل اللي بيزرعه
من بذوره وحبه
وفي ضل شجر
الصفاف اللي
على ميتك بيميل
وفي الهوا العليل
رابط بقرته وجاموسته
وحمارته ونعجته
وخروفه وجديه
ومعزته
والجرادل
رايحة جيه مليانة
تروي عطشهم من ميتك
والكل مستنيك يا نيل
يا ابو الغناوي الحلوة
والمواويل ...
وسهر الليل ..
والقمرة في سماها
ترمي نورها على ميتك
ومراكبي يتهادي بمركبه
فوق صفحتك..
يرمي في بطنك شبكته
يشد بيهاسمكك
اللي بسحرك شبكته
منظر بديع وجميل
من يوم شقيت
طريقك لينا
من منبعك ..
لا حاشك عنا سد
ولامنعك عنا حد
وميتك جايا لينا
عايمة برغوتك
تسمع مواولنا
وغناوينا
وإحنا بنزفلك
من بين الصبايا
الملاح...
عروستك ..
حد غيرنا يانيل
من منبعك
زفلك يوم عروسة
زي إحنا
ما بنزفلك ..
من سنين يا نيل
وإحنا بنزفلك ..
عروسة
حلوة ..
من عرايس النيل..
فلازم تيجينا
وحتما تجينا
ومن ميتك الحلوة
تبدد عطشنا وتروينا
ده إنتا في قلوبنا
يا نيلنا وفي عنينا
وعلى شطك
مستنياك ...
زفة عروستك...
ست الصبايا
الملاح ..
وصوت الناي الجميل
يستقبلك وإنتَ
جي بتتهادي ..
وعايمة بين شطيك
ميتك ..
فياضة وبزيادة
ولا يقطعلك
ربنا في موسم
فيضانك عادة..
وتجينا سكرك زيادة..
محمد عبد النعيم
٢٠٢٠/٧/٩م
ليست هناك تعليقات:
إرسال تعليق