أنا نفس الطفلة ببراءتها -الشاعرة وسام عبده

أنا نفس الطفلة ببراءتها
بدموعها بتغلب ضحكتها
مع لعبة خدتها وخبتها
واتخانقت يومها مع مامتها

أنا صوت مشيتها تاتا تاتا
وفى أيدها حتة شيكولاتة
بصتها اللى بكل بألاطه
وهزارها مع الناس بغتاتة

أنا هى أما ناداها باباها
وفكرها بحاجات ناسياها
ولسور المدرسة وداها
وكأنها تاهت فى متاهة

أنا واجب العربى اللى رعبها
وجدول ضرب تعب أعصابها
انا وردة اتبعت فى كتابها
مع حب خبط على بابها

أنا سرحانها فى غنوة جميلة
أنا نومها واول تغفيلة
و خروجهم مع أول ليلة
لو فى العيد اتلموا العيلة

أنا فسحة مع أصحابها زمان
وفيشار وملبس ولبان
أنا صوتهم جوه الدكان
والضحك اللى فى كل مكان

أنا عمر بيجرى يفكرها
بمرايا ماتقدر تكسرها
ده لأنها حفظت منظرها
ومعاها اترسمت اقدارها

أنا طفلة بدرجة ممتاز
اتحطت جوه البرواز
ولأنها من جوه أزاز
طفولتها دى فعلا حبتها
أنا نفس الطفلة ببراءتها

وسام عبده