ربما إختبأت المسافاتُ بينى وبينكِ .. لكنها لم تغادر .
ضِحكَة ف الكانتين
البن غامق ..والحياه أغمق .
أمَّا انتى .. بحر ..
ب أخش فيه أغرق .
ساعتين على الكورنيش مشيت
مافيش جديد !!
كل الشواطئ معزولين بحديد !!
إنتى الوحيده .. الشاطئ المفتوح
مهما اتَّجَهَت ..
إليكى برضو .. ب اروح !!
كأنى حاجز تدكره ف العذاب !! .
إستانلى .. كوبرى .. ع الأسير البحر
وهوّا لابس بدلته الحمرا
سكران .. بدون خَمرَه
مستنّى إعدامه
ممنوع تبوح بالسر قُدَّامُه
ممنوع تشوفُه خارج الزنازين
ممكن تسيب لُه زياره ع البوابه !!
وتسيب لُه ضحكه بايته ف الكانتين !!
وتمشى ..
وماترميش ل موجُه سلام !! .
ويوحَشَك ..
تشوفُه ف الأفلام !! .
وتنام عشان تقدر تشوف نَفسَك
خط إتصال .. مش خارج الخدمه .
زى الوَدَع .. أنا .. وانتى .. والنجمه
على رَمل ليل .. مستنّى عَرَّافه
ومافيش تذاكر ليها تدخل لنا !! .
مع إنّى ب احلم بعد ما اتغطّى
شايف عيونك برضو عريانه !!
حتى وعليها جفونها عريانه !!
والدمعه عريانه
الضحكه بس .. اتنقّبِت .. بالزور
حطيتنا وسط طابور
وقالت لنا درس ف أصول الحلال
كانت غُراب ب يغنّى ع الأطلال
وانا وانتى .. كورس ليها .. بالعافيه
تلبسنا حتماً ..لو تكون حافيه
وف أى حفله .. تبقى بنت ذوات
أنا وانتى نتحوّل دليل إثبات
على عمر منفى ب يبعتوه جوابات
توصل لنا أحزان بعلم الوصول
معلومه ..
واحنا المحسوبين مجهول
فناجين وجع غامق
فيها الحياه أغمق
نشرب بسرعه نشوفوا مين يسبق
واللى سَبَق له جايزة فوريه
ينزل فى بحر مالوش قرار ... يغرق .
كوبرى إستانلى: هو كوبرى شهير على البحر بمدينة الإسكندريه .
خالد عاطف أبو العزم
ليست هناك تعليقات:
إرسال تعليق