فِ وجُودَك
وبَسْأَل نَفْسي
مِن غِيرَك راح اعْمِل إِِيه
بِتاخُد رُوحي من نَفْسي
ويِقْفِل ع العِنين رِمشي
وبِتْضَلِّم ساعات الليل
وقلبي تِتْعِبُه المَشَاوِير
وبَسْتَنْفِذ سنين الصَبْر
ف دقايق
وبَضَّايِق
من النِّسْمَة لَاتيجي بشوق
أَمَل مَخْنُوق
وف وجُودَك
ياااااه
تاخدني الدنيا بالأحضان
بشوق وحنان
وترجع روحي جُوايا
ويفرَح بالُّلقا رِمشي
يكون لى فرشي وغطايا
وتِضْحَك ف العيون فَرْحَة
وتِغْزِل بالهَنا الطَّرحة
وأفرِش حُضني ضُلِّيلَة
وأعيش احلم معاك لِيلة
تاخدني ف دنيا للعاشقين
وأجري معاك شمال ويمين
وتفرد لي جِناح الشوق
ياخدني لفوق
لِحْدُود السَّما السابعة
وأنا راجعة
أَقَطَّف من السَّما نِجمة
ومن عِين القمر أحلام
وأحَدِّف للسحاب بَسمة
وأغَني لْفَرْحِة الأيام
ده ف وجودَك
منى عبد الرحمن
ليست هناك تعليقات:
إرسال تعليق