باكذِب أنا
مَاوَحَشْتِنِيش
ولاحتى يَعْنِي اشْتَقْتِلَك
انا عايشة عادي دون ماقلبي يِحِن لَك
مَاوَحَشْتِنِيش
واهُو عايشَة باتْكَلِم وباكُل
عارفة اعيش
إيه يعني نبض القلب واقِف
قولتلك أنا عارفة اعيش
إيه يعني روحي كل ثانية تحِن لَك
وعيوني سينما واقفة على مشهد وحيد
وصوته بيرِن ف وداني يهزني
حبيبتي.... روح قلبي أنا
يالِّلي انتِ أقرب م النَفَس للروح
يالِّلي باشِيلِك تحت جلدي
لاجل مايصيبك جروح
واقفل عيوني عشان اطفي مَشْهَدَك
ألقاه بيسْري ف الضلوع ويا الدِمَا
وانا كُلَّما
أحاول انسى إني أفكر ألتقيك
ألقاني فاكرة كل لحظة وكل همسة
حبيبي بتفكرني بيك
مَاوَحَشْتِنِيش
علشان عيوني شايلة صورَك كلها
وقافلة عليهم بالرموش
مش عارفة احُوُش
سِيرتَك من القلب الضعيف
بقى شئ مُخيف
إنك بتبعد والحياة تْبَعِّد معاك
وانا كل ثانية من حنيني لَك
قاعدة هنا مِسْتَنَّياك
مَاوَحَشْتِنِيش
أنا عارفة اعيش
باكْذِب أَنا
منى عبد الرحمن
ليست هناك تعليقات:
إرسال تعليق