إللي بنى مصر يامصراوي
مين ؟ ـ قل لي
عمره ما كان باشا ولا فنان
ولا حلواني يا اخوانا
ولا صقلي
إللي بنى مصر كان فلاح
خدوه بسلاح
في عز الضلمة من بيته
لا ودع اهله ولا غيطه
وعمر يامصر فلاحك
ما كان محتاج
لزغدة عمده ولا باشا ولا لكرباج
وكان بيقول ولا يقولشي
ولو فيكي ما علتشي
راح ابني يامصر مين غيرك
ولحم اكتافي من خيرك
دانا اللي في أرضك الميه
وانا اللي في حضنك السباح
وأنا اللي بابك المقفول على سرك
أنا المفتاح
إللي بنى مصر يا مصراوي
كان فلاح
كان فلاح من قبلي ومن بحري
من النوبة ..
يبل الطوبة من عرقه
ويلزقها على الطوبة
وعمره ما قال أهي نوبة
ولا توبة
ولا اكتافه في يوم مالت
ولا ليلته عليه طالت
ويشرب دمعته ان سالت
وياكل هدمته بعنده
ويشتالك على زنده
لبردك يوم رعش جلده
ولا حرك في يوم هده
ولا يكلش
ولا يملش
ولا يرتاح
إللي بنى مصر يامصراوي
كان فلاح
كان فلاح شايل مدفعه بعزة
في ليبيا في يافا
في صنعا وفي غزة
وفي يونيه
ما غز اليأس فيه غزة
وفي أكتوبر في عز الصوم
ما هزت قوته هزه
وخلى النصر فوق المدنة
كان صداح
اللي بنى مصر يامصراوي
كان فلاح
قولوها في سبحة المداح
قولوها في غنوة الملاح
إللي بنى مصر
يامصراوي .. كان فلاح
الشاعر / محمد نور الدين
ليست هناك تعليقات:
إرسال تعليق