نَجدَه ب الهَوهوَه - الشاعر خالد عاطف ابو العزم

الكثيرون حريصون على صحتهم .. يمارسون رياضة الذل طوال اليوم .

نَجدَه ب الهَوهوَه

البيت وقَع ..
لكن مافيش أنقاض !!
والنهر واقف ..
لا عَلا .. ولافاض !!
فيه ناس ب تطلب نَجدَه .. ب الهَوهَوَه
والكلب عمرٌه لا وَلَد .. ولا باض
زَعَق الوبور فى الناس : نويت السفر
لا حِس رد
ولا وصل لُه خَبَر
قال .. ياحديد ظلموك بنى آدم
خلّوك شبيه لقلوب طُغاة البشر
وانت اللى عايش بين إيديهم فاس
شَق التراب ..
نبَتت حياه للناس
وكنت سيف .. ب يحارب المحتل
وميزان عداله ..
مع البشر يختل
وكنت حَربَه .. ع الأعادى ورمح
تكتب شروط الهدنه وقت الصُلح
وكنت منجل .. يوم حصاد القمح
تجوّز الأولاد .. ويعلا الفرح
مش ذنبك انتَ إنهم ضاعوا
أو إنهم ب بلاش ب يتباعوا
مادام سابوك وحَدك .. ومسكوا الناى
وبفرَحَه غَنّوا للعذاب الجاى !!
وصقَّفوا لُه بالإيادى السُمر !!
ودعوا لُه .. بالقوه .. وطول العمر !!
مش عيب عليك ..
العيب على العايبين .
اللى بمزاجهم .. إرتضوك زنازين !!
وسيف .. يزامِل حبل عشماوى !!
ب طَقيتُه .. نَقَّط .. حضرة الغاوى !!
مستنّى طلعة أى رقَّاصه
وايديه بدم اخواته متعاصه
ولمّا فاق .. ولقاها حفله عليه
كان مات تَعَب ..
ومابتشيلوش رجليه .
يندب يقول .. الظُلم قلبُه حديد
مع إنُّه شَبَهُه .. وعنَّك انت بعيد
هوَّا اللى عملَك برضو جرَّافَه
رَهَن حياته عند عَرَّافه
وهَد بيتُه ..
وبَدِد الأنقاض !! .
ونهرُه عَيَّط .. لا علا .. ولافاض
صَرَّخ .. وطَلَب النجده ب الهَوهوَه
والكلب عُمرُه لا وَلَد .. ولا باض .

خالد عاطف أبو العزم