طعم المُرّ
يانااااااس
طعم الميَّه عندي مُرّ
يكونش الطعم ف الأيام
وأفعالها اللي مابِتْسُر
ولاالطعم فينا احنا
وف العمر الِّلي جَرَّحْنا
حَدْ يقولِّلي....
ويدوق الميَّه ف صَهْريجُه
ويْبَلَّغ قلبي ان مَرارُه
م الميَّه.....
مش من تَهْرِيجُه
خَلُّوني أعيش العُمر الباقي
بِحِلُوْ الوَهْم
ماهو مش مُهِم
خَلُّوني أحِس اني بلاقي
فاليوم لحظات ممكن أحْلَم
وأَمنِّي الروح ولْسَاني أَبْكَم
قال يعني الروح بِتْصَدَّق كِذب
أنا أََصْلي بَصَدَّق.....
معرفش اكْذِب....
بالذات على روحي الِّلي بْتِعْشَق
صِدْق الإحساس
طب يعني محدش هيقولي
ليه طعم الميَّه مِتْمَرَّر
م الميَّة؟
ولا من الأيام؟
منى عبد الرحمن
ليست هناك تعليقات:
إرسال تعليق