سجلى كل الفرح -الشاعرة وسام عبده

سجلى كل الفرح وخلى
لحظاتك موصوفة بالملى
اوعى تقولى تعبت كفاية
اوعى من الحكايات دى تملى
فى أجندة عمرك ياجميلة
جمعى كل الناس والعيلة
أبدأى وحياتك م الليلة
على خوفك بحروفك طلى
بكرة تكون تأشيرة فرحة
تاخدك لبعيد برة الكون
تفضلى فيهم دايما سارحة
وكأنك قاعدة فى بالكون
تتفرجى ع فيلم قديم
وشريط أحداث عمرك فيه
وانت بتسمعى مرة حليم
وبتحفظى غنوة فى اغانيه
تاخدك نجمة بعيد لسماها
مع نغمة ودانك سمعاها
تحلو كده السهرة معاها
والقمر الطالع يعزفلك
أو تطلع شمسك وتنادى
على حلم يجيلك ع الهادى
م الفرح يكون يوم مش عادى
والرسمة فى لوحتك توصفلك
الأيام دى مسيرها تروح
ووجودها يكون مش مسموح
وساعتها اللى يرد الروح
شخابيطك وانت بتتسلى

وسام عبده