جمال الدولى كان يدعوا للحريه بالكتابة على الحوائط ومن أشهر عبارته ( متر الوطن بكام ) .. فقد عقله فى ظروفٍ غامضه وعاش فى ملاعب الكره حتى مات .
بريد إلكترونى لجمال الدولى ❀
هل لسّه بتكتب ع الجدران ف البَرزَخ ؟
ولَّا بتتسلل تكتب فوق القبر ؟
بيقولوا صاحبت الصبار إللى اتمرَّد على قبرك
وادّيت له دروس فى الصبر !!! .
يا جمال
فيه حاجه غريبه بتظهر
بدأت من شهرين ..
وب تكبر .
البويه اللى مغطيَّه كلامك ماتت
وحروفك طلعت وسط شقوقها وفاتت
مستنيَّاك
وبتتحداك
انك ماتجيش
بتقول لَك : قبضوا على الكورنيش !!
قالوا ان قعادُه خساره
وب يسمح لعقول الناس تتنفس
والفكر .. دعاره .
وحرام .. شرعاً
- يتجاوز شرب الخمر -
إن انت تصدق أى كلام
إلَّا .......... لولى الأمر .
بتقول لك برضو :
ان الجردل ف مكانُه
وان البويه مانشفتش
والفُرشه ف حالة صوم
مستنياك .. ماكَلِتش
ولا رسمت حاجه على الحيطه
إلا كلامك
طاهر .. يشبه لصلاة الفجر
ولا راحت تتجوز عُرفى واحد غيرك
- مدفوع الأجر -
بتقول لك : إعلَم
إن البيع أصبح .. ب الكيلو !!
- مش بالمتر -
وان قياس الدم السايل .. ب الفُنطاس !!
- ما بقاش باللتر -
وان الاستاد من زعله عليك فاضى
زى الميتم .. بيقيدوا النور
لكنه عَزا ..
قاعد على كراسيه الميت !!!
ومافيش جمهور .
من ديوان موت بالجبنه
خالد عاطف أبو العزم
ليست هناك تعليقات:
إرسال تعليق