على شَط العُمْق -الشاعرة منى عبد الرحمن

على شَط العُمْق

أَعْلَنْت عَليك الحرب
مش هارجع تاني لعُمْق الدَرْب
خَلِّيني هِنا لحياة مَيِّتة
مالهاش ولاأَيُّها روح
وانا بالمَفْتوح
مبسوطة هِنا
ماانا عايشة وبَاصَّة على الأرواح
تتلاقى بعيد
والشوق عَمَّال بِيْدَبَّح نِنْ الروح
يِمْلاها جِراح
ف العُمق......
الكُل بِيغْرَق جُوَّه عيون الآه
والقلب بتتفجر شرايينه
وعُمر سنينه يضيع
كلها مواضيع
بِتْمَوِّت كل حياةْ الروح
ومْنِين مابَرُوح
أنا بَلْقَى عيونَك بِتْنادي
بِشُوقها الهادي
ولاعلى بالْها العُمر النَّادي
يروح ف الزحمة
من غير رحمة
ولاعلى بالها
الحزن المزروع جُوَّه ضلوعي
ياااااااااااه
فينها دموعي
واقْفالِي بتُخْنُق ف بُكايا
عاوزة أعَيَّط
واحضن كل الناس جُوَّايا
يمكن يملوني أمان
يمكن
هَيعوضوا قلبي الضايع من غيرك
وانت الواقف
على شط العُمْق التاني
بتنادى عنيك
راح ارُد عليك أنا ف ثواني
لاااااااء
بكفايا ردود وحنين ووعود
وعياط
والقلب يزعق من قلبه
ينهار حُبُّه
لااااااااء
مش راح ارُد عليك من تاني
قلبي الشقيان رافض بُعدَك
رافض كل الأشواك
ف طريق بِيْبَعِد عن عيني
بِيَنْسَى حنيني
خَلِّيك
واقف على شَط العُمْق التاني
رووووح ياأناني
وانا هافضل هِنا
مرتاحة أنا
وهَاعْلِنْها عليك الحرب

منى عبد الرحمن