القرش المُر - الشاعر خالد عاطف ابو العزم

لم يتطاول الحفاةُ العراةُ فى البنيان .. نحنُ تقزّمنا .

القرش المُر

طبقاً للنقطه التاسعه ..

من الفقره الخامسه ..
من الماده الأولى ..
من الميثاق الدولى لعدم الحق .
من حقك تسأل : ليّا حقوق ؟
ونقول لك ........ لأ
إلا ياجربوع .. لو فجأه نَضَفت
وبقيت برميل مليان بالنفط
رُتبتُه .. جربان سابق .. وعزيز
اتربَّى .. كمعزه .. ف أرض معيز
ب يعيشوا قَطيع .. وإمامهم جرو
لو يلبس بَدلَه ( بيير كاردان ) ..
ح تشوفُه ب فرو
واذا كانت شئ يشبه ل حريم
ح تشوف الغوله .. اتقلبت .. ( ريم )
مع إن جوازها خطيئه .. تزيد ..
عن أكل الميت فى التحريم . !!
لكن ح تقول لسيادَك .. طُز
العزّه .. تمنها شوال ال رُز !!
واذا جالك غزو ح تهرب زى الفار
ويشيلَك أى حمار
و ب زهو يقول النبى وَصَّى على سابع جار
وصحيح النبى وصّانا ووصَّى الناس
لكن .. بالمسلم .. والصالح
مش بالأنجاس
الجيرَه ساعتها ب تبقى قمار !!
وماحدش قال النبى وصَّى على سابع ( بار ) !!
ولا تاجر .. ب يتاجر .. ف العار !!
ولا حد ب ماله بينهش لحم الحُر
لحم الخنزير .. أجمل بكتير م القرش المُر
ح يبان لَك ساهل ..
لكِنُّه أبداً مش سَهل .
العفن الطالع من أهلُه ح يكون لَك أهل
والنقطه العاشره ..
من الفقره السادسه ..
من الماده الأولى ..
من الميثاق الدولى لعدم الحق
بتقول لك ..
تبقى وضيع .
لو وقت البيع
ماصرختش ..... لأ .

خالد عاطف أبو العزم