يا صاحب العقل -الشاعرة سلوى سعيد

يا صاحب العقل
ايه يثبتلي
عقلك زين
و عينك تايهة
شمال و يمين
خايف من ظلك
من غيرك ؟
خايف من مين ؟!
و كلامك كله
فرح و أنين
إيه يثبت
إن عقلك زين

يا صاحب الصورة
و التفانين
دة حتى الضحكة
على وشك
مر .. حزين
بتغرس شوك
على سكاكين
و إيه يثبتلي
عقلك زين

يا صاحب الصبر
صبرك فين
ماهوش باين
و لا بيلين
تطيب خاطر القسوة
تقول شدي
عليا سنين
ف إيه يثبتلي
عقلك زين

يا صاحبي
إنت مش فاهم
في دايرة
وهمك الدايم
بتتمشى
على سنينك
تخونك
فجأة و تهينك
بتنهي
العمر بإيدينك
عشان كتروا
اللي بايعنك
ف عقلك غاب
و أصبح فين

يا صاحبي
خلاص أنا مليت
هقولك سر
أنا زيك كمان
مش زين
و هنكر ليه
بقيت زيك
كما المجانين .

سلوى سعيد