رقَّاصة بالمجَّان،الشاعر خالد عاطف أبو العزم

رقَّاصه بالمجَّان

لا عدلَ فى الفراغ .. الجميعُ فيهِ يسبح

فاضل يادوب ف محبتك حبّه

إنتى العجوزه .. عامله ليه شابّه ؟

ب تمضغينا .. المستوى ع النَىّ

مع كَدّنا المعمول ب لحم الحىّ .

ونكون حَطب .. مدلوق عليه جازك

حفلة عشا لـ معازيم على جوازك

من أى حَد يمرمغك ف الطين

يسلّمك فى الصبح للملاعين !!

وف المسا رقّاصه بالمجان !!

ينول وصالها كل إنس وجان

وهوّا واقف .. يجمع النقطة !!

أنا جانى منك 500 نقطة

مالهاش علاج لو جِبت ألف طبيب

كل الدوا ف حالتك .. يخيب .. يا .. يخيب

طول ما انتى تاكسى مايركبوش غير نَفَر

ب يمشى بيكى .. واحنا لينا العَفَر

نجرى بـ عصاية شايلها شيخ الغفر

ويلمنا بصُفارة الكمسرى

الخيبة ناشفة ..

يستاهلها الطَرى .

مادام أليف ..

واستأنسُه البربرى .

أبوجهل لو قال لُه أنا عبقرى

يقول لُه .. إنت اللاتِ والعُزَّى

من فَرحِنا .. تاكل .. وتتغذى

تعلى ف سقوطك ..

تبقى سوبر رَب .

ح يُعبدك .. مَن هَب منّا .. ودَب

إنت اللى واهب للسنابل حَب

وللمقابر عضمها البالى

واطى .. ف غفلَه اتحط .. ف العالى !!

والدنيا غايمة ..

يادوب نشوفها طشاش

الغالى منها .. أقل من ب بلاش !!

الدَخلَه .. ميت .. والخروج ميت !!

أصل الفقير كائن ..

لا كان ..

ولا عاش !!