بالة خيش،الشاعر خالد عاطف ابو العزم

بالة خيش

نحن مَدينونَ بقراءةِ الفاتحةِ على أراواحِ الهنود الحُمر

السيف كَذَب ..
واللى صَدَق .. ساحر .
يا(مُعتصم) ..
خُد جنب واتَّاخِر .
جيشك ما بين .. متهودين .. ويهود
أصعب كتير م الرومى والكافر
ماسكين سلاح ..
أمَّا انت .. أغنيه
طلعوا القمر ..
وطلعت طبليه
وحاربت بين الضانى والفَتَّه
ووقعت لمَّا نامت الجته
وخدوك أسير على باب (عموريه)
تدفع دهب ..
فى مقابل العيشه .
كوباية السحلب مع الشيشه
وقَمَره وسط الغيط ف تعريشه
وتدور رحى أعظم حروب الهوى
البنت نَيَّه ..
قلبك اللى استوى .
لكن ضعيف الفَك والأسنان
ومافيش فى فَمَّك غير لُعاب ولسان
وعلاج فحولتك عند أعداءك
ممكن تدوقها ..
بعد ما .. داقك
حَطَك فى بالة خيش من المَعيوب
وركبت أغلى حماره بالمقلوب
ودفعت تمن الجُرسَه والزفَّه
مبروك عليك أسيادك الخِفَّه
(نَقفور) .. وأهلُه .. وعيلته .. والمعازيم
واللى شَهَد ع العقد إنُّه سَليم
ب يَمين على البترول وع المصحف .
ماتخافشى ..
مش ح يلومك (المأمون) .
قول له : النهارده الجميع ب يخون
خلِّيك فى ضهرى عند ابونا هارون
لمَّا يحاسبنى بالميزان ع الجَمر
ويقول لى ليه وانت ولى الأمر
وسط الوَلايا بقيت وِليتهُم
سيبت الأعادى يدخلوا بيتهم
وأمرتهم بالرقص والصُحبَه
قولت اللى حاصل خطه .. مش لعبه
للإنقضاض .. والنصر بالإحضان .
قول : يا أمير المؤمنين إرحَم
أخويا باع ..
لكن عشان يسلَم
ولسَّه صاين عَهدُه وب يحلم
بالشمس تشرق من دروب بغداد
يهرب قصادها البرد والأوغاد
يومها الشجاعه تدب ف الخايبين
تكسر عساكر قيصر الظالمين
ويركّبوه زيى حمار مقلوب
ويدفَّعوه الجزيه زى (إيرين) .
يامُعتَصم ..
وِرثَك سيوف .. مش لِعَب
وحاجات أقل مافيها كان الدَهَب
من غير ما اقول لك .. إنت ح تشوفها
لحظة ما تنزل م الحصان الخَشَب .

المعتصم .. هو أحد أبناء هارون الرشيد الثلاثة محمد الأمين وعبدالله المأمون والمعتصم والذين تولوا الخلافة بعد والدهم بهذا الترتيب وليس وفقاً لأعمارهم فقد كان المأمون أكبرهم سناً
عموريه .. مدينة كانت تحت حكم الروم وهى مسقط رأس الإمبراطور آن ذاك وقد فتحها المعتصم
نقفور .. أحد أباطرة الرومان أجبره الرشيد على دفع الجزيه بعد أن رفض دفعها عند إعتلائه العرش خلفاً لإيرين
هارون .. هو هارون الرشيد رابع الخلفاء العباسيين بعد أبو العباس السفاح وأبو جعفر المنصور وموسى الهادى
إيرين .. إمبراطوره رومانيه كانت تدفع الجزيه لهارون الرشيد .
بداية القصيدة معارضة لقصيدة لأبى تمام فى فتح عمورية .. كانت بدايتها
السيفُ أصدقَ أنباءً من الكتبِ
فى حدهِ ألحدُ بين الجَدِ واللعبِ
( من ديوان مطر أغسطس )