عشّة الغربان،الشاعر خالد عاطف ابو العزم

عشّة الغربان

إلى الشئ المسمى نجيب ساويرس وأشباهه

حادى ..

ماجاش .. بادى .. وراه لسَّه

ورغم هذا .. خلصت القصه

وتوته ..

لاهى .. حدّوته .. ولا غنوه

فى أى وقت ب تنتهى عِنوه

مادام مافيش شاطر لست الحسن

والسندباد غرقان ..

ياحزن الحزن .

بعد أما ساب مركبتُه للقرصان

بقت يادوبك عِشَّه للغربان

تنعَق .. ما بين العضم والتوابيت

إصحوا ..

خلاص مابقاش زمن حواديت .

وانا برضو عارف إنه مش زمنى

لا ح يبقى عنب الشام بلح يمنى

ولا ف العراق يطرح زَتون تونس

لا فيه عزيزه .. ولا أنا يونس

الحب للأحياء .. ماهوش لينا

يادوب بموتنا ندفّى بعضينا

علشان نجيبوا مزيد من الأموات

يتباعوا جُمله ف سوقنا كل تلات

لحمه ل حُفاه ..

فجأه علوا ف الأرض .

ب إيدينا نشوى لحمنا بالفرض

ياكلوها بإشمئزاز على الفَتَّه

مايسيبوا شئ من عضمها حتى

يبقى لكلابهم والكلاب أشرف

ترفض تدوقه ..

بس مين يعرف .

ما احنا خلاص صرنا عديمى القلب

ف بقينا أهون عندهم م الكلب

واللى تهون نفسه عليه يولع

مايستحقش غير يادوب يدمع

عريان جعان مطلوب كمان يقلع !!

وف أخرته عند النبى يرجع !!

بأى وش يشفًَعه.. ويشفع !!

حادى اشتراه ؟ ..

هوًَا اللى كان بادى

لا تطلب الرحمه ولاتنادى

السندباد .. فى معدة الوطاويط

وَحدُه الغُراب واقف على التوابيت

إصحوا ..

خلاص مابقاش زمن حواديت .