موتَه بالمعروف
ليكن الرحيلُ مجانياً .. فأغلبنا لايملكُ رسومَ المغادره .
ب تخبّى ف كروتَك !!
كل الورق مكشوف !!
كل اللى فات .. غامض
كل اللى جاى معروف
مع اختلاف لازم لكسر الملل
ماعادشى شئ مدهش يجيب لَك بَلَل
كرتونة الأحلام شبه كرتونة الشيبسى
أخَف وزناً من بلوفر صوف
واتقَل كتير م الأمر بالمعروف
نفس العبوُّه بوزنها ولونها
لكن بطعم الخوف .
أرجوك بقا ماتبصليش شذراً
وتبدأ التقعير .. تقول نظراً ..........
أنا ح اسبقك ..
واسمحلى اقول عُذراً
أنا فاهم الفوله وقارى الدور
الدَخلَه دى .. قافلَه
والوزن .. مش مكسور .
انا قلبى فات يحجل
وخَضُّه شكل السور
عالى وفوقيه بُرجُه
قاعد عليه مسرور
طَلَبِت صراحه .. بس بالمعقول
تشبه لدرس المبنى للمجهول
إللى قعدنا عليه وربَّعنا
قررنا مانشوفشى اللى ضيعنا
وفرشنا فوقُه ألف زَلِعة مِش !!
وعَشَقنا دودها .. وغنينالُه ب غِش !!
إنُّه .. لا مُقرِف .. ولا
ألعن صنوف .. البَلا
وإنه .. سبحه .. وصلا
بالفِطره متوضّى
واهى كدبه .. وتعدّى !!
والكدب لوكان للسلامه .. حلال !!
زى اما تسرق لقمه م البقال !!
وقت المجاعه ..
واحنا اهو جعانين !! .
جوع الحقيقه .. جوع .. وبزياده
نوقِف حدوده مادمنا فى رَمَاده
مسموح لنا نكدب .. مادام ح نعيش !!
لكن حرام .. لو زادت التحابيش
وحرام .. بُهار الكدب .. فى الخلطه
لازم نظام .. الدنيا مش سَلَطَه
والكدب .. لازم يَعقُبه استغفار
عشق الوطن .. والفقرا .. فى الأخبار
كَفَّارتُه .. ناكُل كل يوم مسكين !!
وجنازه بالمزيّكا والبلالين !!
وحداد يوماتى لكل مِتَّاكل !!
نلعن أبوه .. والفاتحه للقاتل !!
مش قولتلك .. كل الورق مكشوف
مافيش مجال ل كسوف
لكن مادام اللعب إجبارى
ياريت تكون الموتَه بالمعروف .
الوزن .. يُقصد به الوزن الشعرى للقصيده
رماده أى مجاعة وقد أُطلق هذا الإسم على عام حدثت فيه مجاعة فى عهد الخليفة الراشد عمر بن الخطاب رضي الله عنه .. وسمى بعام الرماده .
ليست هناك تعليقات:
إرسال تعليق