أشكال الليل
إن تختارَ وأنت على قيدِ الوجودِ أمرٌ صعب .. لكنكَ قد يفرضُ عليكَ أن تختارَ قبلَ أن توجَد .
على أول ناصيه .. مُحَصِّل نور !!
والتانيه .. مُحُصِّل غاز !!
والتالته .. مُحَصَّل مَيَّه !!
والرابعه .. مُحَصِّل للأيام الجايه !!
إيصالات .. على تعليمك !!
وب مَهرَك !!
وشيكات ع الأولاد .. اللى .. حَ .. يبقوا ف ضَهرَك !!
وفلوس مستشفى ولاده
لازم ندفعها لَك لمَّا ح يبدأ شَهرَك !! .
إعرف :
إن انتَ ح تحلم .. خِلسَه !!
وح تفرح .. خِلسه !!
وتبوس البنت بتاعتك .. خِلسَه !!
والدنيا تحاكمك .. من غير لا قُضاه .. ولاجَلسَه !!
ح تسيبك عايش وسط الزحمه
مش شفقه عليك
أصل الإعدام للميت رحمه !! .
ولقب مرحوم .. مابقاش ب الساهل
مطلوب إثبات ب شهاده بإنك تستاهل
بتقول بوضوح :
إن انتَ ب تتنفس قد المسموح !!
وبوَجَعك لاتقِر .. ولاتبوح !!
ولا عُمرك تطلب تاكل .. غير ب طلوع الروح !! .
ودى برضو ح تدفع فيها كتير
وتقف طوابير
خاشع .. فى سكوت
مع كل اخواتك من طُلاب الموت .
كان لازم أقول لَك بالتفاصيل
أشكال الليل
اللى ح تستقبل راسك .. مش إيد الدكتور !!
لا هى لون شَجَره
ولا صوت عصفور .
قبل ما ح اتجوِّز أُمَّك
لازم آخد منك إقرار
إن انت موافق تدخل
تاخد دور .
علشان ماتقولش ان انا غشاش
أو إنك .. إبن خَديعَه ..
وجيت بالزور .
بقلم خالد عاطف ابو العزم
ليست هناك تعليقات:
إرسال تعليق