فصيلة رعب
باتَ صعبٌ عليَّ احتضانكَ .. تَكْبُر ..وتَصغُر يدايا .. فلا يكتمل .
ثابت علمياً إن الخوف .. إحساس بَشَرى
حلو .. وعِشَرى
لكن فى الواقع ..
ثابت إنه مُبيد حَشَرى
رِمَّه وحِشَرى
من أى صحيح جواك .. ياخُد .. كَسرُه العَشْرى !!
كُتر استعمالُه يسد القلب ..
ويعمل وَحل !!
وزيادتُه ب تسحِل روحَك .. سَحل
وتسيب ف عنيك حشرات الدنيا ..
وتقتل .. بس النحل !!
ناصح جداً
مش ثابت أبداً إنه اتخَم
مش بس يشوفك
لأ .. تتشَم
وب يعرف دوغرى فصيلة رُعبَك
من فَزَعَك
مع أول نظره ..
لأول نقطة دم .
الخوف كائن
لاهو نَظَريَّه .. ولا فرض
مالوهش .. ولاطول .. ولاعَرض
بسهوله بيقدر ياكل أحشائك
ويسيب فضلاته سماد للأرض .
أنا خايف جداً أقول لك
خايف من أحلامك
من كُتر الحلو تسوِّس زى سنانك
والحلم ان سَوِّس
يبقى مصيره الخلع
لو عينك تنشف ..
قلبك ينزف دمع .
نبكيه انا وانت ..
واقول لَك .. هات عنَّك يابنى .
أنا ما استسلمتش ..
دمع عنيك اللى غَلبنى .
مكتوب لى اتعَرَّى .. وأحضن أبرَد أيامَك !!
وأسيب الدنيا .. وهَمَّك مِتدفِّى ف حضنى !!
آسف يا محمد ..
عارف إنك مش فاهم حَرف
الخيط ف كلامى ب يتكَعبِل
مش باين طَرف
مش عارف أعرِب لَك قلبى الممنوع م الصَرف
أو أرفع كَسرة عينى .. قصاد حُبَك
أو اضُم ف حضنى المتدنِّس .. قلبك
أو أجزِم ضعفى .. بحذف العلَّه
وزوال الذِلَّه
وأسَكِّن خوفى عليك .. وانام .
الشاعر خالد عاطف ابو العزم
الله عليك وكفى
ردحذف